I prüms insediamënc da artejan dla localité Pidrô é gnüs realisá di agn 70. La posiziun dlungia la strada statala dla Val Badia é ideala. A mëte man di agn 90 é la zona artejanala gnüda ampliada, spostan le let dla Gran Ega. Aldedaincö ciafunse passa 40 dites artejanales y comerziales tla zona artejanala da Pidrô. La maiú pert di frabicac á n'abitaziun de sorvisc y insciö abitëiel ince tröpes families tla zona, che cunta zirca 90 abitanc. Deplü strutüres sciöche plazes por jüc, trus da jí a spazier y n bel lech porta prò a alzè la cualité de vita.