Statut de comun

Le statut dl Comun da La Val é le regolamënt iuridich plö important te chël che al vëgn definí i organns plö importanc dl Comun, sciöche le consëi de comun, la junta y l'ombolt, cun details sön sües funziuns, modalités de lita, compic y dërc de control. Al vëgn regolé la partezipaziun dla popolaziun tres consultaziuns, incuntades cun la popolaziun, refrendum, dërt de azes ai documënc y formes inovatives de partezipaziun. Tl test suradit él ince normes sön la parité di sesc, sön la sconanza dles mendranzes politiches y linguistiches, y sön le funzionamënt di sorvisc publics dl post, dles aziëndes speziales y dles istituziuns dl comun. Al é preodü n'atenziun particolara por la trasparënza, l'informaziun y la partezipaziun tla planificaziun.

Le statut é fondé sön le Statut de autonomia y sön les normes por i comuns dla Provinzia autonoma da Balsan. Implü regolëiel ince l'aministraziun democratica autonoma a livel local.